Ese Kuba mukuru Bibiliya ivuga bisobanura iki?

---

Bene data ntimube abana bato ku bwenge, ahuwo mube abana b’impinja ku bibi, ariko ku bwenge mube bakuru.

Muri iki cyanditwe tubonamo igitekerezo gikomeye cy’Imana cyo kutaba abanyabwenge mu bibi ahubwo tukamera nk’impinja kuri byo, kuko impinja ntacyo

ziba zizi ku bijyanye n’ibintu iby’aribyo byose mu buzima kuko ziba zitarakura ngo zigire ubwo bushobozi bwo kumenya!

Ni muri uyu murongo Imana ihamagarira abantu bayo gukurira mu bwenge. Ubwenge buvugwa hano ni bumwe buturuka mu gusabana n’Imana mu ijambo ryayo kugeza aho rikurengeye ugasigara uri uruhinja mu bibi, uri uruhinja mu byaha, uwo twagereranya nk’umuswa mu bibi, bivuga ngo ugasigara ntacyo uzi ku bijyanye n’icyaha!

Ushobora kuvuga uti: “ibi bintu ko bikomeye byashoboka bite?” Igisubizo kiroroshye, kuko kiri muri icyo cyanditswe twasomye haruguru; Ni ukuba mukuru mu bwenge, bigaragara ko ntawaba mukuru atarabonye igihe gihagije cyo gukura!

Imana iduhishurira ko, turamutse dukomeje gukurira mu kuyimenya biciye mu Ijambo ryayo twazagere ku rugero n’urwego rukomeye aho duhinduka impinja mu bibi, ku rundi ruhande tukisanga twarabaye bakuru mu bwenge, ari kwo kuba bakuru mu byo kubaha Imana, gukunda Imana no gukora ibyiza itwifuzaho!

Ibi nta handi biva: ni mu mwanya munini uha Imana muri wowe, ni mu bikorwa no mu ntekerezo zawe za buri munsi werekeza ku Mana, biva kandi no mu busabane buhagije wemera kugirana n’Imana.

Na none dusoma mu rwandiko intumwa Pawulo yandikiye ab’ i Kolosayi ati: “Ni cyo gituma tudasiba kubasabira uhereye igihe twabyumviye, twifuza ko mwuzuzwa ubwenge bwose bw’Umwuka no kumenya kwose kugira ngo mumenye neza ibyo Imana ishaka” {Abakolosayi 1: 9-10}

Pawulo akomeza ku murongo wo hepfo asobanura ibyiza byo kuba uruhinja mu bibi, no kuba mukuru mu bwenge, ni ukuvuga mu byiza. Ati: “…mukomereshejwe imbaraga zose nk’uko ubushobozi bwayo bw’icyubahiro bungana kugira ngo mubone uko mwiyumanganya muri byose mukihanganana ibyishimo mushima Data wa twese waduhaye kuraganwa n’Abera umurage wo mu mucyo.” {Abakolosayi 1: 11-12}

Tubona hano ko bishoboka kuzuzwa ubwenge bwose bw’Umwuka ukamenya neza icyo Imana ishaka; birumvikana ko wujujwe ubwenge bwose bw’Imana, buba bwarasimbuye ubundi bwenge bubi bityo ugasanga wakuriye mu bwenge buboneye Imana ikwifuzaho, noneho ukanasobanukirwa ko n’ibibi nta sano na ntoya mufitanye. Ukaba uri uruhinja mu bitanezeza Imana, hanyuma ukaba mukuru mu by’ubwenge biyinezeza.

Nshuti Bavandimwe dukwiye kumenya no kwizera ko ibi bishoboka rwose naho ubundi bibaye bidashoboka nkuko bamwe tubitekereza, Imana ntiyari kutubwira ko bishoboka. Dukwiye kubyizera ko bishoboka rwose ko umuntu ashobora kuba umuswa mu bibi (mu byaha) ari byo Bibiliya yise kuba uruhinja mu bibi, hanyuma tubaka bakuru mu by’ubwenge (imirimo myiza) twarangiza tukabyizera tukanabigenderamo.

Imana irashaka ko uyu ari wo uba umugabane wanjye nawe!